दार्चुला : अहिलेसम्म सफल आरोहण गर्न नसकिएको सुदूरपश्चिम प्रदेशको दार्चुला जिल्लामा अवस्थित अपी हिमालको आरोहण गर्न १५ सदस्यीय टोली आउँदैछ । १५ जनाको आरोही टोली दार्चुलाका लागि शुक्रवार काठमाडौँबाट हिडेको छ ।
नेपाल पर्वतारोहण संघ (एनएमए) द्वारा आयोजित बिदाइ कार्यक्रममा संस्कृति पर्यटन तथा नागरिक उड्डयन मन्त्री बद्री पाण्डेले आरोहीको टोलीलाई बिदाइ गरेका हुन् । आरोही टोलीलाई मन्त्री पाण्डेले बिदाई गर्दै पहिलो आरोहण सुदूरपश्चिम प्रदेशका लागि ऐतिहासिक र सुखद् क्षण भएको बताए ।
नेपाल सरकारले हालै मात्र राजपत्रमार्फत सुदूरपश्चिम प्रदेश र कर्णाली प्रदेशका ९७ वटा हिमालको दुई वर्षका लागि आरोहण शुल्क छुट दिने निर्णय गरेसँगै अपी हिमालको आरोहण प्रारम्भ भएको हो । मन्त्री पाण्डेले पर्वतारोहण क्षेत्र नेपाललाई चिनाउने महत्वपूर्ण साधना रहेको बताउँदै शेर्पा तथा गैर–शेर्पा आरोहीहरूको संयुक्त प्रयासले हिमाल रोहणको क्षेत्रमा नयाँ युगको सुरुवात हुने विश्वास व्यक्त गरे ।
‘यो अभियानले स्थानीय स्तरमा समन्वय र सहकार्यलाई प्रवद्र्धन गर्नुका साथै सुदूरपश्चिम प्रदेश र कर्णाली प्रदेशको पर्यटन विकासमा महत्त्वपूर्ण योगदान पु¥याउनेछ,’ पाण्डेले भने ।
अपि हिमाल गाउँपालिकाबाट समेत संलग्न टोलीमा १३ जना आरोही सहभागी छन् । आरोहण अभियानमा जोखिम रहे पनि स्थानीयलाई समेत समेट्दै अघि बढाइएको यो पहल सुदूरपश्चिम पर्यटन र पर्वतारोहणको क्षेत्रमा नयाँ अवसरका रूपमा हेरिएको छ ।
सात हजार १ सय ३२ मिटर अग्लो रहेको अपीहिमालमा अहिलेसम्म सफल आरोहण भएको छैन् । वर्षौै पहिले विदेशी आरोहीले आरोहणको प्रयास गर्दा उनले सफल आरोहण गर्न नसकेको बताइन्छ । त्यसपछि आरोहणका लागि कसैले प्रयास गरेनन् । गाउँपालिकासँग पनि अपी हिमाल आरोहण गरेको तथ्याङ्क छैन् ।
अपी हिमालको बेश क्याम्प मात्रै भिजिट हुने गरेको छ । बेश क्याम्पसम्म भने विदेशी तथा स्वदेशी पर्यटक आइरहन्छन् । विशाल फेद रहेको त्यहाँ विभिन्न ताल तलैया तथा छोटा हिमशृङ्खला र रमणीय ठाउँ छन् । अपी हिमालको फेद पुग्न दुईतिर (ब्याँस र अपिहिमाल गाउँपालिका) बाट मार्ग पर्ने गर्छ ।
यो खबर तपाईंलाई कस्तो लाग्यो?
