दार्चुला : दार्चुलामा विश्व रेविज दिवसको अवसर पारेर सप्ताहव्यापी रेविजविरुद्धको निःशुल्क खोप अभियान सुरु गरिएको छ । सेप्टेम्बर २८ तारिख अर्थात असोज १२ गतेको विश्व रेविज दिवसको अवसरमा सोमबारदेखि खोप अभियान सञ्चालन गरिएको भेटेरिनरी अस्पताल तथा पशु सेवा विज्ञ केन्द्र दार्चुलाका कार्यालय प्रमुख लाल बहादुर बोहराले जानकारी दिए ।
सप्ताहव्यापी कार्यक्रम अनुसार सामुदायिक तथा घरपालुवा कुकुर बिरालोलाई रेविज विरुद्धको खोप लगाइने उनले बताए । आफूले पालेको कुकुर बिरालोलाई खोप लगाई रेविजबाट सुरक्षित रहन विज्ञ केन्द्रले सबैमा अनुरोध गरेको छ ।
`रेविज एक प्रकारको जनावरको टोकाइबाट सर्ने भाइरजन्य संक्रमण हो । यदि रेविज लागेको जनावरले टोकेमा यस विरुद्ध खोप नलगाएमा रेबिज संक्रमण जनावरबाट मानिसमा सर्न सक्छ । यो रोग लागिसकेपछि निको हुन असम्भव छ । त्यसैले यसको एक मात्र उपाय खोप नै भएको पशु चिकित्सकहरुले बताएका छन् ।´
यो खबर तपाईंलाई कस्तो लाग्यो?
