दार्चुला : लास्कुखोलामा रहेको अस्थायी फलामे पुलको जग भासिँन थालेपछि दार्चुलास्थित सुरक्षा निकायले तारजाली भरेका छन् । महाकाली नगरपालिका वडा नम्बर ४ र वडा नम्बर १ जोड्ने फलामे पुलको दुबै पट्टी ग्याल्भिन तारजाली भरिएको हो ।
खोला कटानले जोखिममा रहेको पुलको संरक्षणका लागि तारजाली लगाएर तटबन्धन गरिएको दार्चुलाका प्रमुख जिल्ला अधिकारी अनिल पौडेलले जानकारी दिए ।
प्रमुख जिल्ला अधिकारी पौडेलको नेतृत्वमा खटि गएको सुरक्षा निकायको टोलीले त्यहाँ तटबन्धन गरेको हो । जिल्लास्थित सशस्त्र प्रहरी र नेपाल प्रहरीको सक्रियतामा जोखिमयुक्त पुलको संरक्षण गरिएको प्रमुख जिल्ला अधिकारी पौडेलले बताए । २०७९ सालमा लास्कुखोलामा आएको बाढीले स्थानीयलाई आवतजावत गर्ने झोलुंगे पुल बगाएपछि अस्थायी रुपमा त्यहाँ फलामे पुल निर्माण गरिएको थियो । अहिले उक्त पुलको छेउतिरबाट खोलाले कटान गर्दा पुल जोखिम रहेको थियो । केहिदिन अघि मात्रै महाकाली नगरपालिका वडा नम्बर ४ का अध्यक्ष जगत बहादुर चुनाराले पनि पुल संरक्षणको पहल थालेका थिए ।
यो खबर तपाईंलाई कस्तो लाग्यो?
